അച്ചനും ഞാനും

അച്ചാ , ഒരു സംശയം

ചോദിച്ചോ

അച്ചാ , ഈ ബൈബിൾ പ്രകാരം , നമുക്ക് മറ്റു മതങ്ങളെ അംഗീകരിക്കാൻ പറ്റുമോ ?

ബൈബിളിൽ എവിടാ അംഗീകരിക്കാൻ പാടില്ല എന്നു  പറയുന്നത്?

എന്നിലൂടെ അല്ലാതെ പിതാവിന്റെ അടുക്കൽ എത്താൻ  സാധിക്കില്ല എന്നു യേശു പറഞ്ഞിട്ടുണ്ടല്ലോ . ഇതൊരെണ്ണം മാത്രം. ഇനിയും ഉണ്ട്, ഞാൻ തന്നെ വഴുയും സത്യവും ജീവനും ആകുന്നു . പിന്നെ പഴയ നിയമത്തിലോട്ടു കടന്നാൽ ഇഷ്ടം പോലെ ഒണ്ടു , എടുത്ത് നിരത്തട്ടെ ?

വേണ്ട, ഇതു തന്നെ ധാരാളം. അല്ല മോനെ, അപ്പൊ ഒന്നു ചോദിക്കട്ടെ ?, ഇതു മാത്രമേ ഒള്ളോ നിന്റെ സംശയം ? .

ഇതേ ഇപ്പൊ തോന്നിയുള്ളൂ, എന്താ അച്ഛാ ?

അപ്പൊ നീ യേശു പറഞ്ഞപോലെ നിനക്കുള്ളതൊക്കെ വിറ്റു ദരിദ്രന്മാർക്കു കൊടുത്തിട്ടു വന്നു നിക്കുവാണ്  അല്ലെ ?

ഹിഹി , അച്ഛൻ ബ്രോ , അതു പൊളിച്ചു . അതൊക്കെ നടക്കുന്ന കാര്യമാണോ ?

അല്ലെ വേണ്ട, എളുപ്പമുള്ളതൊക്കെ ചെയ്തോ? ,ഫോർ എക്‌സാംപിൾ , അയൽക്കാരനെ നിന്നെ പോലെ തന്നെ സ്നേഹിച്ചോ?,  സഹോദരൻ തെറ്റു ചെയ്താൽ അവനോടും അവന്റെ ഭാര്യയോടും ഒക്കെ ക്ഷമിച്ചോ ?

അച്ഛാ, അവരുടെ കാര്യ എന്നോട് പറയണ്ടാ..ഈ ക്ഷമ ഒക്കെ അവർക്കും ആകാമല്ലോ ?

പുന്നാര മോനെ,അതു ശരി , അപ്പൊ നിന്റെ സ്വന്തം കാര്യം വന്നപ്പോ , ബൈബിൾ ഒക്കെ മൂലേല് തള്ളി .  ഇപ്പൊ കണ്ടില്ലേ ബൈബിൾ അല്ല പ്രശ്നം ,നീ .. നീ ആണ് കുഴപ്പം. നിനക്കു  ഇഷ്ടമുള്ളതൊക്കെ ചെയ്യാൻ നീ ബൈബിളിലെ അറ്റവും മുറീം ഒക്കെ എടുത്ത് ന്യായം ആക്കും .

ഒക്കെ , സമ്മതിച്ചു അച്ഛനെന്നെ  പൂട്ടി , എന്നാലും, ഇത്രേം പച്ചക്കു യേശു  അതെന്തിനാ പറഞ്ഞത് ?

എടാ ... ഹോ, ളോഹ ഇട്ടു പോയ്‌ ,ഇല്ലേൽ പറഞ്ഞേനെ .. എടാ ,അതൊക്കെ  വേറെ  ഏതേലും  സാഹചര്യത്തിൽ പറഞ്ഞതായിക്കൂടെ. ഉദാഹരണം : കർത്താവ് എന്തു ചെയ്താലും കുറ്റം കണ്ടു പിടിക്കാൻ  പുറകെ നടക്കുവല്ലാരുന്നോ പരീശന്മാരും സാദൂക്യരും ഒക്കെ.  "അവൻ വെറും ആശാരി ചെക്കൻ , പോരാത്തതിന് നസ്രേത്ത് കാരനും" , എന്നൊക്കെ പറഞ്ഞു ഫുള്ള് അലമ്പ് റോൾ  അല്ലെ . ശിഷ്യന്മാരാണെൽ ബെസ്‌റ്  ടീമ്സും .  ഒരു ഉപമ പറഞ്ഞാൽ അതു മൊത്തം  വിശദീകരിച്ചു അവിച്ചു കൊടുത്താലേ മനസ്സിലാക്കൂ.   അപ്പൊ  സഹികെട്ടു പറഞ്ഞതാരിക്കും , എടാ പിള്ളേരെ , ഞാൻ , ഈ നിക്കുന്ന ഞാൻ , ഞാൻ പറയുന്നതേ കേക്കാവൂ , മറ്റവന്മാരു പറയുന്നെലെ പോയാൽ നിന്റെ ഒക്കെ കാര്യം കട്ട പോക .  ഈ ഒരു സെറ്റപ്പിൽ  കർത്താവ് അതു  പറഞ്ഞതായിക്കൂടെ? .

അച്ഛനിതിപ്പൊ ചുമ്മാ കൈയ്യീന്നു ഇട്ടതല്ലേ?

അതേ , നീയും അതൊക്കെ തന്നെ  അല്ലെ ചെയ്യുന്നത് . അയൽവക്കത്തെ കാരനേം ബാക്കി ഉള്ളവരേം ഒക്കെ സ്നേഹിക്കാൻ ഇഷ്ടം പോലെ ഉദാഹരണങ്ങൾ ബൈബിളിൽ പറഞ്ഞിട്ടുണ്ട് . അതിൽ വേറൊരുത്തന്റെ വിശ്വാസത്തെ ബഹുമാനിക്കുന്നതും പെടും.  

അപ്പൊ പിന്നെ മൊത്തം കൺഫ്യൂഷൻ ആയല്ലോ . ഇതിപ്പോ എന്താ കേൾക്കണ്ടേ ?

പിന്നേ , കേൾക്കുന്ന ഒരാള്, എന്തായാലും  നീ നിന്റെ ഇഷ്ടം പോലെയെ  ചെയ്യൂ . അപ്പൊ ആലോചിച്ചു ചെയ്യൂ , വേറൊരുത്തനെ  വെറുക്കാൻ ആണ് ഇഷ്ടമെങ്കിൽ പോയ വെറുക്കു.എന്നിട്ടു അങ്ങോട്ടും ഇങ്ങോട്ടും പാര വെച്ചു തീരു. പക്ഷെ അതിന്റെ എടേൽ ബൈബിൾ എങ്ങാനും എടോത്തോണ്ടു വന്നാൽ അമ്മച്ചിയാണേ നിന്റെ മുട്ടു കാലു ഞാൻ തല്ലി ഒടിക്കും . എന്നിട്ടു ആശുപത്രീൽ വന്നു യേശു യെരുശലേം ദൈവാലയത്തിൽ നിന്നു കള്ളന്മാരെ  പുറത്താക്കിയ ഭാഗം നിന്നെ വായിച്ചു കേൾപ്പിക്കും.